囍 Big Day 點樣用

開婚禮，定係加入？

新人撳「我哋係新人 — 開新婚禮」。統籌、兄弟姊妹同賓客撳「我有邀請碼 — 加入」。可以喺呢度轉語言（繁中 / English），之後喺設定都改得。

揀一個範本起步

填你嘅名同新人名、日子，再揀範本：傳統中式、教堂、酒店、午宴或者簡約。範本會幫你預先寫好成日流程同籌備清單，之後隨便改。

• 想由頭嚟過，可以喺流程右上角揀「用範本重新開始」。

輸入或者掃描邀請碼

輸入新人俾你嘅碼，或者撳「掃描 QR code」對住另一部電話。兄弟姊妹碼、統籌碼、賓客請柬碼同「加電話」嘅碼都係喺呢度用。

• 邀請碼要新人付款之後先生效。

認領自己個位

如果新人已經預先加咗你，撳自己個名就加入咗；如果冇，填名、電話同角色，以新成員身份加入。

倒數同我嘅籌備

最頂係距離大日仲有幾多日。下面「我嘅籌備」列出分咗畀你嘅籌備事項，可以直接剔，撳入去睇詳情；冇就唔會顯示。

只睇同自己有關嘅

撳「顯示」揀：全部、我、某一組（姊妹、兄弟、家人、幫手）或者某一個人。兄弟姊妹預設係「我」，新人同統籌預設係「全部」，每個婚禮會記住你揀咗咩。

每一項入面有咩

時間、名稱、📍地點，下面係標籤：狀態、負責嘅組別同人、⏰ 鬧鐘（金色即係會喺你部機響），同埋「只限新人」（冇分享畀兄弟姊妹）。備註會喺highlight咗嘅框入面。

• 負責嘅人撳「開始」同「完成」，大家即刻見到進度；撳錯可以「重設」。
• 「開始」會通知新人同負責嘅人：「進行中：敬茶」。

大日當天：而家同下一項

大日當天，進行緊嘅項目會標「而家」，之後嗰項標「下一項」，打開 app 會自動捲去而家做緊嘅嘢。

加或者改一項（新人同統籌）

撳一項就可以改，撳「＋」加新一項：時段（早上、日間、儀式、晚宴）、開始同完結時間、中英文名稱、地點同備註。中英文寫一樣就得，另一種語言會顯示返你寫嗰個。

邊個負責、邊個睇到

揀負責嘅人同組別。「分享畀兄弟姊妹」熄咗嘅話，只有新人同統籌睇到。「俾賓客睇」會將時間同名稱放喺賓客請柬度（例如恭候、入席）。

鬧鐘

每項最多加 10 個鬧鐘：準時，或者提早 5、10、15、30、60 分鐘，每個可以寫備註（例如「叫化妝師」）。鬧鐘只會喺負責嗰啲人部機響，鎖咗機都會響。

• 要先喺設定填好婚禮日子先加到鬧鐘。
• 改咗開始時間，鬧鐘會自動跟住移。

時間軸

喺「顯示」旁邊轉去「時間軸」，每項變成一格，高度代表幾耐，同時進行嘅項目會並排。用兩隻手指縮放，或者撳右上角「−」「＋」，最細可以睇清 15 分鐘。

拖一拖就改時間

新人同統籌長撳一格再上下拖，時間會每 5 分鐘跳一格；拖底部嘅把手就改完結時間。放手即刻儲存，下面會出「已改到 10:30」，撳「復原」可以還原。只會改呢一項，後面嘅唔會跟住移。

測試一下

設定 →「測試鬧鐘同通知」。鎖咗部機，10 秒後應該會響鬧鐘同收到通知。如果冇，跟住提示喺電話設定開返權限。大日之前每個人都試一次最穩陣。

• 你會收到通知嘅情況：一項開始、分享咗嘅項目改時間或地點、有人分任務畀你、有人用邀請碼加入（新人同統籌）、賓客回覆請柬（新人同統籌）。
• 撳通知會打開相關嘅頁面；如果你喺幾個婚禮，會先轉去嗰個婚禮。

開始綵排

新人同統籌喺流程倒數下面會見到「綵排」卡，撳「開始綵排」。

揀邊個參加

「包括兄弟姊妹」熄咗就只有新人同統籌行。「響鬧鐘」開咗，去到有鬧鐘嘅項目會喺負責嘅人部機響一次。參加嘅人會收到「綵排開始 🎬」。

一項一項行

頂部會顯示「綵排中 · 10:30 · 2/12」。流程好似大日咁標「而家」同「下一項」，大家照撳「開始」同「完成」練習。新人同統籌用「上一項」「下一項」推進，撳「結束」或者行完最後一項就完。

相簿

「相簿」分頁：新嘅排先，每張有邊個加。撳「＋」一次揀幾張相或者片。上面嘅標籤撳一下就只睇嗰類，例如「敬茶 12」。

睇相同加標籤

撳一張相全螢幕睇，左右掃睇下一張，可以放大、分享、儲存同寫說明。下面嘅標籤撳 ✕ 刪除；「+ 標籤」旁邊係相簿用開嘅標籤，撳一下就加，唔使打字。

跟住項目嘅檔案

流程項目、籌備事項同供應商都可以加相片同檔案（PDF 或者其他）。流程卡有 📎 同一排預覽，撳就打開。

• 檔案計入婚禮嘅空間（1、5 或 20 GB）。

邀請碼

新人同統籌會見到兩個碼：兄弟姊妹碼同統籌碼，可以複製或者分享。統籌碼加入嘅人有同新人一樣嘅權限，所以只俾信得過嘅人。

• 碼外流咗？喺設定「重新產生邀請碼」，舊碼即時失效。

成員名單

每個人嘅名、稱呼、邊一家、負責嘅嘢同電話（撳就打）。「未加入」即係新人預先加咗但佢未用碼認領；「📱2」即係佢用緊兩部電話。

加或者改成員

新人同統籌可以預先加人（佢之後用碼認領個位）、改角色同負責嘅嘢，或者刪除。其他人只可以改自己個名同電話。

籌備清單

未做嘅排先，按限期排。過咗期會標紅；每項有類別、負責嘅人，同供應商狀態（已揀咗就係「✓」加佢個名，未揀就係「3 個候選」）。撳圓圈剔完成，撳入去睇詳情。

月曆

轉去「月曆」睇每日有咩要做：紅點過咗期、金點未做、灰點做咗。今日有圈，婚禮嗰日標「囍」。撳一日睇嗰日嘅事項，「＋」就加一項喺嗰日；冇限期嘅收埋喺「未定日期」。

事項同供應商

每項事項可以放幾間供應商：已揀嘅排先，跟住係「考慮緊」嘅候選（報價、投票、連結），再下面係「冇揀」。「加供應商」加候選；有兩間或以上就可以「比較」。

比較同投票

每間一欄、每個條件一行：報價、每席價錢、相數等等，最好嗰個會用綠色★標出。新人同統籌各自投 👍🤔👎 同寫意見。決定咗撳「揀呢間」，其他候選會變「冇揀」。

• 「改比較項目」可以自己加條件，同埋設定越少越好定越多越好。

預算

「預算同供應商」：總預算、已承諾、已付、仲差幾多同剩餘預算，只計已揀嘅供應商。下面列晒每間已揀嘅供應商。

賓客名單

頂部統計：出席人數、未回覆、唔出席同人情總數。每位賓客顯示回覆、坐邊席；「📱」即係佢打開咗請柬，「回覆咗」有日期，「3/4 位」即係邀請咗 4 位、回覆 3 位。

發請柬

打開一位賓客，「請柬」部分有佢自己嘅 QR code 同邀請碼。撳「分享」用 WhatsApp 等傳出去，訊息已經寫好。一個碼一家人用，最多 10 部電話。

• 「換新碼」會令打開咗舊碼嘅電話登出。
• 賓客唔佔婚禮嗰 50 部電話。

分席

每席顯示坐咗幾多人、幾多個位（香港預設 12 位），滿咗或者爆咗會標出。「向賓客顯示座位」開咗，賓客先會喺請柬見到自己坐邊席，所以排好先開。

菜單

「菜單」加每道菜嘅中英文名，再排好次序。賓客會喺請柬見到。

回覆

新人名同倒數下面，撳「出席」或者「唔出席」，出席就揀幾多位（最多係新人邀請嘅人數）。新人會即刻收到通知。

你嘅座位

新人公開座位之後，會見到自己坐邊席同同枱有邊個；未公開會寫「座位稍後公佈」。

時間地點

場地、地址（撳「開地圖」導航）同新人揀咗俾賓客睇嘅時間。

菜單同留言

當晚菜單，同新人嘅留言，例如服飾要求或者泊車安排。

婚禮資料

新人同統籌可以改婚禮名、日子、新郎新娘名、預算，同埋俾賓客嘅場地、地址同留言。

我嘅電話

列出你登入咗嘅電話同最後幾時用；其他電話可以喺度登出。

加電話

想喺另一部電話（例如 iPad）用同一個身份？撳「加電話」，用另一部電話掃描 QR code 或者輸入個碼。個碼 10 分鐘內有效，每部電話佔婚禮一個位。

幾個婚禮

撳頁頂嘅婚禮名轉去另一個婚禮，或者「加婚禮」。適合婚禮統籌，或者同時幫緊幾個婚禮嘅朋友；每個婚禮嘅鬧鐘都會照響。

啟用婚禮

籌備免費。想請其他人加入，新人揀一個計劃：1 GB HK$88、5 GB HK$188 或 20 GB HK$388，每個婚禮俾一次，用 999 日，最多 50 部電話。

空間

顯示用咗幾多空間。唔夠可以升級，只補差價。婚禮到期後轉做唯讀，相片同檔案再留 90 日；想留耐啲可以買保存（每 GB 每年 HK$5）。

離線同未同步

冇網時頂部會顯示「離線 · 用緊手機入面嘅資料」，你照改、照剔，改動會排隊，有網自動傳出去（「3 項未同步」）。撳條 bar 睇有咩未傳，失敗嘅可以「再試」或者「唔要」。

• 開婚禮、加入、付款、綵排同打開未下載嘅檔案就要上網。
• 兩個人同時改同一項，app 會話你知。